Ýakyn 20 ýylyň dowamynda Finlýandiýada ilatyň çalt garramagy (ýaşuly adamlaryň sanynyň köpelmegi) sebäpli, ýurtdaky bar bolan ýaşaýyş jaýlarynyň tas 30%-iniň boşap galmak howpy bar. Bu barada OP-Pohjola maliýe toparynyň taýýarlan täze hasabatynda duýdurylýar.
Gözleglere görä, ýurtdaky öýleriň ýarysyndan gowragynyň eýeleri iň uly ýaşaýjysynyň ýaşy 60-dan geçen maşgalalardyr. Ýaşulularyň aradan çykmagy ýa-da olaryň ýörite garrylar öýlerine göçmegi sebäpli, boşaýan jaýlar barha artar.
Ýakyn 10 ýylda şeýle jaýlaryň sany ondan öňki ýyllara garanyňda 10% köp bolar. Bu ýagdaý aýratyn hem 2030-njy ýyllarda has-da güýçlener.
Hasabatlardan çen tutsaň, 2026-njy ýylda eýeleriniň aradan çykmagy sebäpli 22 müňden gowrak jaý boşar we 2045-nji ýyla çenli bolsa bu görkeziji ýylda 25 müň jaýa çenli ýeter.
Bu kynçylyk esasan kiçiräk şäherlerde we obalarda (aýratyn-da ýurduň gündogarynda) ýüze çykar. Sebäbi ol ýerlerde ýaşuly jaý eýeleriniň sany gaty köp, emma täze jaý satyn almak isleýänleriň sany örän azdyr.
OP-Pohjola toparynyň ykdysatçysy Ýoona Widgren: «Jaýlar esasan şonsuz hem alyjysy az bolan sebitlerde boşap başlar. Bu bolsa ýurduň jaý bazaryny bütinleý böler. Täze jaý gurluşyklary diňe uly şäherlerde jemlenmegini dowam eder» diýip, bu barada öz garaýşyny mälim edýär.
Hünärmenleriň pikiriçe, geljekde käbir kiçi şäherlerde täze jaý gurmak bes ediler. Onuň deregine bar bolan köne jaýlary abatlamaga ýa-da bütinleý boşap, weýran bolan öýleri ýykmaga has köp üns berler.
