Hytaýda 65 ýaşdan uly bolan ýaşaýjylaryň sany 1949-njy ýylda demografik statistika ýöredilip başlanany bäri ilkinji gezek 14 ýaşdan kiçi bolan çagalaryň sanyndan geçdi. Bu barada «South China Morning Post» neşiri ýazýar.
Geçirilen ylmy gözlegiň maglumatlaryna görä, 2025-nji ýylyň noýabr aýyna çenli, takmynan, 1,4 milliard ilaty bolan ýurtda gartaşan adamlar umumy ilatyň 15,87%-ini emele getirýärdi. Çagalaryň paýy bolsa 15,25%-e ýetýär.
Gözleg 20 milliondan gowrak ýaşaýjyny öz içine alýan saýlama usuly esasynda geçirildi. Hytaýda soňky gezek tutuş ýurt boýunça ilat ýazuwy 2020-nji ýylda geçipdi.
Alnan täze maglumatlar ýurtda zähmete ukyply ilatyň paýynyň kem-kemden azalýandygyny hem görkezýär. Häzirki wagtda 15-59 ýaş aralygyndaky ýaşaýjylar ýurduň umumy ilatynyň 61,89%-ini düzýär. Mundan on ýyl ozal bu görkeziji 67,33% derejesindedi.
Demografiýa boýunça bilermen He Ýafu ilatyň ýaş gurluşynyň üýtgemegi netijesinde Hytaýyň gartaşan adamlara seretmek boýunça asylly maşgala däp-dessurlarynyň çynlakaý kynçylyklar bilen ýüzbe-ýüz bolýandygyny mälim etdi. Şol bir wagtyň özünde, ýurduň pensiýa ulgamyna düşýän agram we maliýe ýüki hem barha artýar.
Mundan ozal Hytaýda çaga dogulmagynyň sanynyň yzygiderli peselýändigi habar berildi. Ýanwar aýynda çap edilen resmi maglumatlara görä, bir ýylyň dowamynda täze doglan çagalaryň sany 17% azaldy. Ýurtda 11,31 million ölüm hasaba alnan bolsa, doglanlaryň sany 7,92 million boldy.
