BMG-niň başlangyjy bilen Oksford uniwersitetiniň Abadançylyk gözleg merkezi we «Gallup» instituty bilen hyzmatdaşlykda taýýarlanan «World Happiness Report» hasabaty, dünýäde iň bagtly ýurtlaryň sanawy hödürlendi. Bu hasabat her ýyl 20-nji martda bellenilýän Halkara bagt güni mynasybetli neşir edilýär. Reýting düzülende durmuş goldawy, girdeji, saglyk, erkinlik, jomartlyk we korrupsiýanyň derejesi ýaly faktorlar hasaba alynýar.
«World Happiness Report 2026» boýunça, bu gezek ýene-de Finlýandiýanyň bagty çüwdi. Ýurt bassyr dokuzynjy ýyl dünýäniň iň bagtly ýurtlarynyň sanawynda birinji orny eýeleýär. Ikinji ýerde Islandiýa, üçünji ýerde bolsa Daniýa ýerleşdi.
Soňra sanawy Şwesiýa we Norwegiýa dowam etdirýär. Bilermenler munuň sebäplerini sosial ynamyň ýokary derejesi, ösen durmuş goraglylyk ulgamy, saglygy goraýşyň we bilimiň elýeterliligi, deňsizligiň pesligi hem-de jemgyýetçilik agzybirligi bilen düşündirýär. Bu ýurtlarda raýatlar iş we şahsy durmuşyň deňagramlylygyndan razy, döwlet edaralary bolsa ilatyň uly ynamyny gazanýar.
Şol bir wagtyň özünde, reýtingiň ahyrynda (147-nji orun) eýýäm dokuzynjy gezek iň bagtsyz ýurt diýlip ykrar edilen Owganystan ýerleşdi. Şeýle-de, iň soňky orunlarda Sýerra-Leone (146) we Malawi (145) bar. Pes bahalar köpýyllyk çaknyşyklar, syýasy durnuksyzlyk, ynsanperwer çökgünlikler we ykdysady çökgünlik bilen baglanyşyklydyr.
Pikir soraşma gatnaşyjylardan öz häzirki durmuşyna 10 basgançakly şkala boýunça (iň gowy durmuş — 10, iň erbet — 0) baha bermek soralýar. Bu bahalaryň esasynda üç ýyllyk döwür üçin ortaça bal hasaplanýar.
Hasabatyň awtorlarynyň bellemegine görä, şu ýyl sosial ulgamlaryň we sanly tehnologiýalaryň abadançylyga ýetirýän täsiri hasabatyň üns merkezinde boldy. Gözlegçiler onlaýn gatnaşyklaryň, aýratyn-da ýaşlaryň durmuşyndan razylygyna nähili täsir edýändigini seljerdi.
