30-njy maýda Gazagystanda «Merkezi Aziýa — Italiýa» görnüşindäki sammite gatnaşmagynyň çäklerinde Prezident Serdar Berdimuhamedow Italiýanyň Premýer-ministri Jorja Meloni bilen duşuşdy diýip, TDH habar berýär.
Prezident Serdar Berdimuhamedow Italiýa tarapyndan öňe sürlen «Merkezi Aziýa — Italiýa» formatynyň ýurtlarymyzyň arasynda berk özara gatnaşyklary ýola goýmagyň netijeli usuly hökmünde möhüm ähmiýetini belläp, Türkmenistanyň onuň üstünlikli ösdürilmegine goşant goşmaga taýýardygyny tassyklady.
Şeýle hem Türkmenistanyň Prezidenti Premýer-ministr Jorja Melonini şu ýylyň 12-nji dekabrynda Aşgabatda döwlet we hökümet Baştutanlarynyň, halkara düzümleriň ýolbaşçylarynyň gatnaşmagynda geçiriljek halkara foruma gatnaşmaga çagyrdy.
Duşuşygyň dowamynda bellenilişi ýaly, iki ýurduň arasyndaky söwda-ykdysady hyzmatdaşlyk nebitgaz pudagynda, ulag, dokma senagaty ulgamlarynda we işewür düzümleriň ugry boýunça yzygiderli ösdürilýär. Özara haryt dolanyşygynyň ýylsaýyn artmagy munuň aýdyň güwäsidir.
Döwlet Baştutany energetika we himiýa senagaty, demir ýol üpjünçilik ulgamlarynda, ekologiýa, oba we suw hojalygy ugurlarynda hyzmatdaşlygy ösdürmäge uly mümkinçilikleriň bardygyny aýtdy hem-de şunuň bilen baglylykda, Türkmenistanyň italýan tarapynyň tekliplerine garamaga taýýardygyny belledi.
Şeýle hem Serdar Berdimuhamedow söwda-ykdysady hyzmatdaşlygy ulgamlaşdyrmak maksady bilen, hökümetara topary ýa-da işewürlik geňeşi görnüşinde bilelikdäki mehanizmi döretmegi teklip etdi.
Premýer-ministr Jorja Meloni Türkmenistanyň Prezidentiniň tekliplerini goldap, Italiýanyň bu ugurdaky hyzmatdaşlyga taýýardygyny beýan etdi.
Söhbetdeşligiň barşynda dostlukly ýurduň Premýer-ministri Türkmenistanyň Prezidentini özi üçin islendik amatly wagtda Italiýa sapar bilen gelmäge çagyrdy.
