3D modelirleme boýunça britaniýaly hünärmen Sisero Moraes ilkinji gezek Lýudwig wan Bethoweniň (1770-1827) kelleçanagynyň esasynda onuň daşky keşbini gaýtadan dikeltdi. Onuň aýtmagyna görä, portret “bellibir derejede agras” boldy, kompozitory döwürdeşleri-de hut şeýle suratlandyrypdy diýip, OrtogOnLineMag žurnalyna salgylanyp, Daily Mail ýazýar.
Beýik nemes kompozitorynyň keşbini dikeltmek üçin 1863-nji ýylda Bonndaky muzeýiň sargydy bilen düşürilen kelleçanagyň suraty hem-de 1888-nji ýylda toplanan ölçegler ulanyldy. Kelleçanak tomografiýanyň we ýewropalylarda ýumşak dokumanyň galyňlygy baradaky maglumatlaryň kömegi bilen sanly görnüşe geçirildi.
Esasy 3D model döredilenden soň, Moraes suratkeş Ýozef Karl Ştiler tarapyndan 1820-nji ýylda çekilen Bethoweniň portretinden ugur alyp, ýüz sypatyny, saçyny, egin-eşigini we keşbini goşdy. Käbir elementler neýroulgamyň kömegi bilen işlenildi.
Bethoweniň häsiýeti we daşky keşbi barada onuň döwürdeşleriniň ýatlamalaryndan belli. Ony agras, köpçülige goşulmaýan we sölpi adam hökmünde suratlandyrypdylar. Britaniýaly dirižýor Mark Wiglsuortyň pikiriçe, onuň häsiýetiniň ýaramazlaşmagy eşidiş ukybynyň peselmegi bilen baglanyşyklydy, ýöne ol Bethoweniň mylakatly we akylly bolmalydygyny belläp geçdi.
Moraes kompozitoryň içki gopgunynyň onuň haýran galdyryjy iş ukyby bilen baglanyşyklydygyny öňe sürýär. Ol Bethoweniň aýdym-sazda goldaw tapyp, döredijilik arkaly kynçylykdan baş çykarandygyny aýdýar.
Öň, şu ýyl Sisero Moraes şol döwrüň başga bir beýik kompozitory Wolfgang Amadeý Mosartyň keşbini gaýtadan dikeldipdi.
