Android ulanyjylary Instagram goşundysynyň has köp energiýa sarp edip başlandygyna üns berdi. Bu mesele Reddit-de we beýleki platformalarda işjeň ara alnyp maslahatlaşyldy. Ulanyjylar deň wagtda ulanmak bilen dürli goşundylaryň energiýany sarp edişini deňeşdirdi.
Ulanyjylaryň biri, Samsung Galaxy A53 smartfonynyň eýesi Instagram-yň 54 minutda zarýadyň 12,4%-ini, WhatsApp-yň bolsa 49 minutda bary-ýogy 2,4%-ini sarp edendigini görkezdi.
Käbirleri bu meseläni Instagram-yň has köne wersiýasyny gurnamak bilen çözmäge synanyşdy, ýöne bu gurluşyň gyzmagyna getirdi. Beýlekiler Instagram Lite-a geçdi we batareýanyň sarp edilişi ep-esli peseldi. Bu meseläniň goşundynyň esasy wersiýasy bilen baglanyşyklydygyny görkezýär.
Google meseläniň bardygyny boýun aldy we 382.0.0.0.49.84 belgisi bilen Instagram täzelenmesini çykardy. Kompaniýa onuň energiýanyň köp sarp edilmeginiň öňüni almalydygyny nygtaýar. Ulanyjylara goşundynyň iň soňky wersiýasyny gurnamak maslahat berildi.
Täzelenmeden soň smartfon eýeleri akkumulýatoryň işiniň kadaly ýagdaýa gelendigini habar berdi.
