Tesla kompaniýasy «Model Y Performance-iň» täze wersiýasyny synag edýär. Prototip meşhur Nýurburgring ýaryş ýolunda görüldi. Bu model elektrokrossoweriň iň çalt we tehnologiki taýdan iň kämilleşdirilen wersiýasy bolar.
Gizlin alnan suratlara görä, ulagyň uzaldylan yzky spoýleri bar we tekerleri «Model S Plaid-iňkä» meňzeş. Asma ulgamy peseldilipdir, gyzyl tormoz supporterleri bolsa täze tormoz ulgamynyň bardygyny aňladyp biler.
Ulagyň «Standard», «Sport» we «Track» ýaly tertipleri bolan uýgunlaşýan asma ulgama eýe bolmagyna garaşylýar.
Çeşmeleriň maglumatlaryna görä, kapotyň aşagynda «Model 3 Performance-dan» alnan, täzelenen goşa hereketlendirijili ulgam ýerleşer. Kuwwaty, takmynan, 513 at güýjünde bolup, 100 km/sag tizlige 3,2-3,3 sekuntda ýetip biler. Ýol ätiýaçlygy – amerikan aýlawlaryna görä, takmynan, 467 km.
Salonynda sport oturgyçlary we multimediýa ulgamynda özboluşly grafika peýda bolup biler. Öň tarapdan seredilende, daşky dizaýnda kän bir üýtgeşme ýok we öň tanyşdyrylan «Model 3 Performance» modeline görä has sada.
Resmi tanyşdyrylyşyň 2025-nji ýylyň dördünji çärýeginde bolmagyna garaşylýar. Häzirki «Model Y Performance» wersiýasynyň bahasy 52 müň 990 ýewrodan başlaýar we 100 km/sag tizlige 4,8 sekuntda ýetýär. Täze wersiýa hem tizligi, hem-de tehnologiki mümkinçilikleri boýunça bu modelden öňe geçer.
