Şweýsariýanyň Alp daglaryndaky Mulengs obasynda 3D printerde çap edilen bina guruldy. Onuň beýikligi 30 metre barabar. Bu 3D çap tehnologiýasynyň kömegi bilen döredilen dünýäde iň beýik binadyr diýip, Designboom habar berýär.
Taslama Şweýsariýanyň Sýurih ýokary tehniki mekdebi (ETH) bilen bilelikde Origen gaznasy tarapyndan durmuşa geçirildi. Bina Tor Alva adyny aldy, ol “Ak diň” diýmekdir.
Bina barokko stilinde ýerine ýetirildi. Desga 3D printerde çap edilen 32 sütünden ybarat. Olar binanyň içinde ýerleşen abstrakt şekilli otaglary gurşap alýar. Binanyň ýokarky bölegi ýakymsyz howadan gorag hökmünde ulanylyp bilinjek ýeňil, aýrylýan membrana bilen ýapyldy.
Desganyň içinde dik basgançak gurnaldy. Ol panorama görnüşli konsert meýdançasyna eltýär.
Binanyň elementleri ýelim ulanmazdan, aýrylýan nurbatlar bilen birikdirildi. Bu hem binany çalt gurnamaga we zerur bolan ýagdaýynda sökmäge mümkinçilik berýär.
Taslama daglyk ýerlerde häzirkizaman binagärliginiň we 3D tehnologiýalarynyň mümkinçiliklerini görkezýär.
