Ierusalimiň iň gadymy ilatly etraby bolan Dawidiň şäherinde geçirilen gazuw-agtaryş işleri mahalynda ysraýylly arheologlar goýy gyzyl daşly kiçijik altyn ýüzügi tapdylar. Hünärmenleriň bellemegine görä, tapyndy irki ellinçilik döwrüne degişlidir, ýagny takmynan 2300 ýyl ozal, sebiti miladydan öňki 332-nji ýylda Aleksandr Makedonskiý basyp alyp yzýany döredilipdir.
Bu eýýäm soňky ýylda bu ýerden tapylan şuňa meňzeş ikinji ýüzük. Öňküsi birneme ulurakdy, ony arheologlar 2024-nji ýylyň maý aýynda tapypdylar. Diametrinden çen tutsaň, iki ýüzük hem çagalar - oglanjyklar ýa-da gyzjagazlar üçin niýetlenendir.
Ellinçilik döwründe granat ýaly açyk daşly altyn şaý-sepler ýoň bolupdyr. Bu şaý-sep däp-dessurlary Hindistandan we Parsystandan gelipdir we grek serkerdesiniň basyp alyşlaryndan soň täze söwda ýollarynyň açylmagy bilen meşhurlyk gazanypdyr.
Iki ýüzük hem uly binanyň düýbünden, b.e. öňki III asyryň ahyryna – II asyryň başlaryna degişli gatlakdan tapyldy. Başga-da, arheologlar şol ýerden bürünç gulakhalkalary, şahly haýwanyň şekili salnan altyn gulakhalka we altyn monjuk tapdylar.
Alymlaryň pikirine görä, şaý-sepleriň bilgeşleýin poluň aşagynda gömlen bolmagy mümkin. Munuň sebäbi, gyzlaryň çagalykdan ululyga geçmeginiň nyşany hökmünde toýuň öňüsyrasynda öýde şaý-sepleri gizlemek däbi bilen baglanyşykly bolup biler.
Arheologlaryň Iýerusalimdäki ellinçilik döwründen bäri altyn şaý-sepleriň şeýle uly ýygyndysyny ilkinji gezek tapyşy. Alymlaryň bellemegine görä, bu Iýerusalimiň baý bolandygyny we şol döwürde şäher ilatynyň durmuşynyň ýokary derejede bolandygyny görkezip biler.
