Müsürde Luksoryň günbatar kenaryndaky Patyşalar jülgesinde faraon Amenhotep III-niň aramgähini dikeltmek işleri tamamlandy. Bu barada ýurduň syýahatçylyk we gadymy ýadygärlikler ministri Şerif Fathi habar berdi. Ol ýadygärligi myhmanlar üçin açdy diýip, Phys.org ýazýar.
Işler 20 ýyldan gowrak wagt – 2001-nji ýyldan bäri üç tapgyrda alnyp baryldy. Taslama Müsürden, Ýaponiýadan we Italiýadan 260-dan gowrak hünärmen gatnaşdy. Olar çyglylyk we wagt zerarly zaýalanan diwarlary berkitdi, gadymy suratlary dikeltdi.
Aramgäh 14 metr ýeriň aşagyna gidýär we uzynlygyna 36 metr uzalýar. Onda faraonyň jaýlanan otagy we faraonyň aýallary – Tiýa we Sitamun üçin iki otag ýerleşdirilipdir. Diwarlarda “Merhumlar kitabyndan” sahnalar we Amenhotep III-niň Müsür hudaýlarynyň ýanyndaky suratlary saklanyp galypdyr.
Aramgäh 1799-njy ýylda fransuz inženerleri tarapyndan açyldy, soň ony Tutanhamonyň aramgähini açan arheolog Goward Karter öwrendi. Şol wagta çenli artefaktlaryň köpüsi, şol sanda sarkofag ýitipdi.
Ýadygärligiň açylmagy 2025-nji ýylyň 1-nji noýabryna meýilleşdirilen Kairde Uly Müsür muzeýiniň işe girizilmegine gabat getirildi. Häkimiýetler munuň 2025-nji ýylyň ilkinji bäş aýynda 26% ýokarlanan syýahatçylygyň ösüşine goldaw bermegine bil baglaýar.
