Ysraýylyň demirgazygynda, Kineret kölüniň golaýyndaky Susita milli seýilgähinde arheologlar Wizantiýa döwrüniň 97 altyn teňňesinden we onlarça şaý-sep böleklerinden ybarat hazynany tapdy. Bu barada Ynet portaly habar berýär.
Şaýy pullar 1400-1500 ýyl mundan ozal zikgelenipdir, olaryň arasynda 610-njy ýylda Kiprde zikgelenen örän seýrek nusga hem bar. Şaý-sepler dürler, ýarym gymmat bahaly daşlar we aýna bilen bezelen altyn gulakhalkalardan ybarat. Käbir teňňelerde mata bölekleri, hazynany gizlemek üçin ulanylan haltanyň galyndylary saklanyp galypdyr.
“Bu Ysraýylda gury ýerde tapylan Wizantiýa döwrüniň iň uly hazynalarynyň biri. Onuň özboluşlylygy dürli imperatorlaryň dolandyran döwürlerine degişli şaý-sepleri we altyn teňňeleri öz içine almagydyr” – diýip, Haýfa uniwersitetiniň Arheologiýa we deňiz siwilizasiýasy mekdebinden doktor Maýkl Aýzenberg belledi.
Wizantiýa döwründe gadymy Susita şäheri ýedi sany buthana bilen möhüm hristian merkezi bolupdyr. Bu ýerde gazuw-agtaryş işleri Haýfa uniwersitetiniň arheologlary tarapyndan eýýäm 26 ýyl bäri alnyp barylýar.
