Taýwanyň hassahanalarynda lukmançylyk işgärlerine ýardam bermek üçin döredilen dünýäde ilkinji Nurabot robot şepagat uýalary synagdan geçirilip başlandy. Enjam ýönekeý işleri ýerine ýetirýär: dermanlary eltip berýär, palatalara aýlanyp çykýar we gelýänlere ýoldaş bolýar. Bu şepagat uýalarynyň fiziki iş ýüküni, esasanam, işgärleriň ýetmezçilik edýän gijeki çalşyklarynda düşýän agramy 30% azaldýar.
Bütindünýä saglygy goraýyş guramasynyň berýän maglumatlaryna görä, 2030-njy ýyla çenli kyn iş şertleri, aýlygynyň azdygy we aşa ýadalýandygyny sebäpli dünýäde 4,5 million şepagat uýasy ýetmezçilik eder. Bu meseläni çözmek üçin Foxconn, Nvidia we Kawasaki kompaniýalary AI robotlaryny Taýwanyň keselhanalaryna ornaşdyrmak boýunça synag geçirdi.
Nurabot wirtual öwrenmek üçin Nvidia Isaac for Healthcare-i ulanýan FoxBrain ulgamy bilen işleýär. HoloScan we Jetson Orin tehnologiýalary robota hassalaryň ýagdaýy barada maglumatlary hakyky wagtda ýygnamaga mümkinçilik berýär. Bu şepagat uýalaryna ünslerini has çylşyrymly meselelere jemlemäge kömek edýär.
TCVGH hassahanasynyň şepagat uýalarynyň işi departamentiniň müdiriniň orunbasary Şu-Fang Lýunyň belleýşi ýaly, akylly maşynlar lukmanlaryň raýatlara has maksatly we zerur idegleri edip bilmek mümkinçiliklerini giňeldýär. Onuň sözlerine görä, öňdebaryjy saglygy goraýyş ulgamy bolan Taýwan şeýle innowasiýalar üçin amatly bolup durýar.
Nurabot diňe ilkinji ädimdir. Foxconn we Nvidia hassahanalar üçin hassalaryň möhüm alamatlaryny yzarlamaga niýetlenen modelleri öz içine alýan täze AI gurallaryny taýýarlaýarlar. Bu tehnologiýalar adaty hassahanalary takyk anyklaýyşly we netijeli kömegi berip bilýän akylly lukmançylyk merkezlerine öwürmek üçin döredildi.
