Germaniýanyň Swikkau şäherindäki zawod möhüm sepgide ýetdi - konweýerden millionynjy elektromobil çykdy. Ol Kings Red Metallic reňkine eýe bolan Volkswagen ID.3 GTX Performance boldy.
Bäş ýarym ýylyň içinde zawod içinden ýandyrylýan hereketlendirijilerden doly ýüz öwrüp, elektromobil önümçiligine geçdi.
Elektrokarlaryň önümçiligi 2019-njy ýylyň noýabrynda MEB platformasyna esaslanan ID.3 modeli bilen başlandy. 2022-nji ýylyň ýanwaryna çenli, ID.5 çykandan soň, zawod elektrik hereketlendirijilerine doly geçen ilkinji uly awtoöndüriji boldy. Benzin hereketlendirijili soňky awtomobil 2020-nji ýylyň iýunynda konweýerden çykyp, 1904-nji ýylda başlanan eýýamy tamamlady.
“Million elektromobil – toparyň uly zähmetiniň netijesi. Indi biz bäsdeşlige üns berip, aýlawly ykdysadyýetiň mümkinçiliklerini öwreneris” – diýip, Volkswagen Sachsen GmbH-iň ýolbaşçysy Danni Auerswald belledi.
Zawodyň müdirler geňeşiniň başlygy Uwe Kundtmann 2026-njy ýyldan önümçiligiň bir böleginiň Swikkaudan başga ýerlere geçiriljekdigini belledi.
Zawodyň gaýtadan enjamlaşdyrylmagyna maýa goýumlar 1,2 mlrd ýewrodan geçdi. Häzirki wagtda Swikkau Ýewropada Volkswagen Group-yň ähli elektromobilleriniň ýarysyny öndürýär.
2019-njy ýyldan bäri konsern MEB platformasynda 2,3 mln ulag çykardy. 2024-nji ýylda zawod 204 müň elektrokar taýýarlady, 2025-nji ýylyň birinji çärýeginde konserniň Ýewropanyň elektromobil bazaryndaky paýy bolsa 26% boldy.
1990-njy ýyldan bäri zawod 7 milliondan gowrak awtomobil çykardy.
