Amerikanyň Alef Aeronautics startap kompaniýasy özüniň uçýan «Model A» atly elektromobiliniň 1000-den gowrak synag uçuşyny üstünlikli tamamlandygyny mälim etdi. Kompaniýa indiki ýyl taýýar ulaglary ilkinji müşderilerine gowşurmagy meýilleşdirýär.
Inženerleriň aýtmagyna görä, «Model A» ýollarda adaty ulag ýaly sürüp bolýan, şol bir wagtyň özünde bolsa dikuçar ýaly uçup hem gonup bilýän dünýäniň ilkinji uçýan elektromobilidir. Häzirki wagtda Kremniý jülgesindäki zawodda bu ulaglaryň ilkinji nusgalaryny ýygnamak işi eýýäm başlandy.
Ulaglaryň ilkinji tapgyry robotlar tarapyndan däl-de, el bilen ýasalar we olar iň öňürti sargyt eden müşderilere berler. Şeýle-de ulaglar hünärmenleriň gözegçiliginde hakyky durmuş şertlerinde synalyp görler we kompaniýa ilkinji eýelerine ulagy nädip dolandyrmalydygyny öwreder.
Taslamanyň baş direktory Jim Duhowny işleriň bellenen meýilnama boýunça barýandygyny aýdýar. Bu taslama mundan 10 ýyl öň başlanypdy. Onuň esasy maýadary we maslahatçysy meşhur Tesla kompaniýasyna we bitkoine iň irki maýa goýan meşhur Tim Dreýperdir.
Uly ölçegdäki ilkinji nusgasy 2022-nji ýylda tanyşdyrylan elektromobil adaty ulag ýaly 350 kilometr ýol geçip bilýär, asmanda bolsa 170 kilometr aralyga çenli uçmaga ukyby bar.
Tanyşdyrylyşdan soň, «Alef» kompaniýasy ABŞ-nyň Federal raýat awiasiýasy dolandyryşyndan ýörite uçuş rugsatnamasyny almagy başardy. Häzirki wagta çenli dünýä boýunça bu uçýan ulag üçin 3500-den gowrak deslapky sargyt alyndy. Sargytlaryň umumy bahasy takmynan 1 milliard dollara barabar boldy.
