Türkmenistanyň Halk Maslahatynyň Başlygy Gurbanguly Berdimuhamedow «Arkadag» futbol toparynyň tälimçilerini, türgenlerini hem-de janköýerlerini toparyň Aziýanyň Futbol konfederasiýasynyň Çagyryş ligasynyň çempiony bolmagy bilen gutlady.
Gutlagda gazanylan bu uly üstünligiň hemişelik Bitaraplygymyzyň şanly 30 ýyllygyna mynasyp sowgatdygy bellenilip geçilýär.
"Çekeleşikli geçen final duşuşygynda aýratyn yhlaslylyk, maksada okgunlylyk, ussatlyk görkezdiňiz. Ýeňiş gazanyp, Aziýanyň Futbol konfederasiýasynyň Çagyryş ligasynyň Kubogyna mynasyp bolduňyz. Siziň gazanan bu ýeňşiňiz ýaşlaryň sporta bolan söýgüsini has-da artdyrýar" diýip, Gurbanguly Berdimuhamedow belleýär.
Türkmen halkynyň Milli Lideri «Arkadag» futbol toparynyň abraýly halkara ýaryşda gazanan pul baýragyny Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna geçirmek hakynda haýyşyny göz öňünde tutup, bu serişdäni Bazar Amanow adyndaky Döwlet çagalar kitaphanasynyň täze binasynyň gurluşygyna gönükdirmek barada karara gelnendigini aýtdy.
"Bu döwrebap kitaphana ýaş nesliň sanly ulgam arkaly kämil bilim almagyna oňyn täsirini ýetirer" diýip, türkmen halkynyň Milli Lideri belleýär.
"Ýeňiş gazanmak siz bilen, alkyşlamak biz bilen!" diýip, Türkmenistanyň Halk Maslahatynyň Başlygy sportsmenlere ýüzlenýär.
2023-nji ýylda «Arkadag» futbol topary Türkmenistanyň çempiony bolmagy başardy. Türkmenistanyň Kubogyny almak ugrundaky ýaryşda hem ýeňiş gazanyp, ýokary ussatlygyny görkezdi.
