Bukingem köşgi patyşa Karl III-niň we şa aýaly Kamillanyň iki sany täze portretini görkezdi. Suratlar köşgüň resmi saýtynda ýerleşdirildi.
Bu suratlar 2023-nji ýylda sargyt edildi. Suratkeşleri bolsa şanyň we şa aýalynyň özi saýlady. Karl III-niň portretini Piter Kuhfeld çekdi. Ol köp ýyl bäri şa maşgalasy bilen hyzmatdaşlyk edýär, öň şazada Uilýam bilen Garriniň portretlerini çekdi hem-de daşary ýurt syýahatlarynda Karlyň ýanynda boldy.
Suratkeş portretiň üstünde bäş gezek işledi. Olaryň ikisi Sent-Jeýms köşgüniň bezelen otaglarynda geçdi we bu ýerde fon hökmünde Tagt zaly ulanyldy. Galan seanslar Windzor galasynda geçirildi. Däp bolşy ýaly, patyşa döwlet mantiýasynda we medallar bilen harby-deňiz formasynda şekillendirildi. Onuň gapdalynda stolda Imperatoryň döwlet täji dur.
Şa aýaly Kamillanyň portretini Pol S.Benni çekdi. Portretde Kamilla mantiýada we şirmaýy reňkli köýnekde şekillendirilen. Ol är-aýalyň tebigata bolan söýgüsini alamatlandyrýan kümüş we altyn gül nagyşlary bilen bezeldi. Köýnegi dizaýner Brýus Oldfild döretdi. Suratkeş portreti Klarens-hausda alty tapgyrda çekdi.
Britan monarhlarynyň resmi portretlerini döretmek 1620-nji ýyldan bäri dowam edip gelýän däpdir. Karl III bilen Kamillanyň täze suratlary 6-njy maýdan 5-nji iýun aralygynda Milli galereýanyň Merkezi zalynda goýlar. Soň olar Bukingem köşgüniň Tagt zalyna geçiriler.
