2026-njy ýylyň 26-njy fewralynda Londonda Türkmenistanyň daşary işler ministri Raşid Meredowyň Beýik Britaniýanyň Daşary işler, Arkalaşygyň işleri we ösüş boýunça ministri Iwett Kuper bilen ikitaraplaýyn duşuşygy geçirildi. Lankaster-haus binasynda geçirilen gepleşiklere Ýewropa, Demirgazyk Amerika we daşarky çäkleri boýunça ministr Stiwen Dauti hem gatnaşdy. Bu barada Türkmenistanyň DIM-iniň metbugat gullugy habar berýär.
Gepleşikleriň dowamynda taraplar ikitaraplaýyn hyzmatdaşlygyň, sebit gün tertibiniň we möhüm halkara meseleleriniň giň gerimini ara alyp maslahatlaşdy. «Merkezi Aziýa – Birleşen Patyşalyk» görnüşindäki ilkinji ministrler duşuşygynyň ähmiýeti hem aýratyn nygtaldy.
Türkmenistan halkara meseleleriniň BMG-niň Düzgünnamasynyň esasynda diňe parahatçylykly ýollar bilen çözülmegine ygrarlydygyny ýene bir gezek tassyklady. Gepleşiklerde ýaşyl tehnologiýalar, sanlylaşdyrmak, ulag we medeni-ynsanperwer gatnaşyklary ösdürmegiň geljegi uly ugurlaryna seredildi.
Günüň dowamynda Türkmenistanyň daşary syýasat edarasynyň ýolbaşçysy Merkezi Aziýa ýurtlarynyň we Beýik Britaniýanyň daşary işler ministrleriniň iş naharyna gatnaşdy. Raşid Meredow öz çykyşynda birnäçe anyk başlangyçlary, şol sanda bilelikdäki okuw maksatnamalaryny ýola goýmagy we «Türkmenistan – Birleşen Patyşalyk Medeni Dialogy» atly täze formaty döretmegi teklip etdi.
Owganystanyň parahatçylykly ösüşine goldaw bermek meselesine aýratyn üns berlip, munda TOPH gaz geçirijisi, elektrik geçiriji ulgamlary we demir ýol taslamalarynyň ähmiýeti bellenildi. Şeýle-de, ministr Britaniýanyň hukuk we maslahat beriş kompaniýalaryny çekmek arkaly tehniki hyzmatdaşlygy giňeltmegi we serhetüsti söwdada aýdyňlygy üpjün etmek üçin sanly çözgütleri ornaşdyrmagy teklip etdi.
Söhbetdeşligiň ahyrynda sebitde durnuklylygy we ösüşi üpjün etmek üçin Beýik Britaniýanyň tehnologik mümkinçiliklerini hem-de sebit ýurtlarynyň diplomatik tagallalaryny birleşdirmegiň wajypdygy nygtaldy.
