Derbişir graflygynyň Matlok şäherinden (Beýik Britaniýa) sekiz ýaşly Elliott atly oglanjyk öýleriniň howlusyndan ammonitleriň galyndylaryny tapdy. Ammonitler - 140-180 million ýyl ozal ýura döwründe ýaşap geçen gadymy deňiz mollýuskalary. Oglanjyk galyndyny oýnap ýörkä tötänden tapypdyr.
Elliott maşgalasy bilen üç aý mundan ozal täze öýlerine göçüpdi. Ol oýnap ýörkä, hek daşlaryny gazyp, olaryň birinde adaty bolmadyk oýuklary görýär. Ene-atasy tapyndylary barlamaga kömek edýär we tiz wagtdan bularyň adaty daş däl-de, gadymy jandarlaryň galyndylarydygy mälim bolýar. Olaryň arasynda dinozawrlar döwründe ummanlarda ýaşan spiral görnüşli çaňňalakly deňiz mollýuskalary bolan ammonitler bar.
Elliottyň ejesi oglunyň bu açyşdan hoşaldygyny we indi bu ýerden has köp galyndy tapmagy arzuw edýändigini aýtdy.
Ammonitler – kameralara bölünen çaňňalakly, ýok bolup giden kellesi aýakly mollýuskalardyr. Olaryň ady goç şahly şekillendirilen gadymy Müsür taňrysy Amon bilen baglanyşykly. Alymlar çaňňalaklarynyň diametri 1-2 sm-den 2 metre çenli bolan ammonitleriň 3 müň töweregi görnüşi bar diýip hasaplaýarlar.
