Gemini çat-boty suratlary işläp taýýarlamak üçin täze mümkinçiliklere eýe boldy. Google öz blogynda täze algoritmiň nämeler edip bilýändigi barada düşündirdi.
Suratlary üýtgetmek üçin indi diňe çat-bot bilen adaty dilde gürleşmek ýeterlik. Mysal üçin, indi neýrotordan suratyň arkasyndaky fonuň üýtgedilmegini, suratdaky obýektiň başga bir ýere geçirilmegini ýa-da surata täze elementleriň goşulmagyny haýyş edip bolýar. Google tarapyndan neşir edilen mysalda, ite kepkanyň geýdirilendigini we onuň ýaşyl otlukdan ýerden kenara geçirilendigini görmek bolýar.
«Mysal üçin, siz öz suratyňyzy ýükläp, saçyňyzyň dürli reňklerde nähili görünjekdigi barada surat döretmegini Gemini-den haýyş edip bilersiňiz. Ýa-da aždarhalar baradaky ertekiniň ilkinji taslamasyny taýýarlamagyny we bu hekaýany suratlar bilen üpjün etmegini sorap bilersiňiz» — diýip, Google düşündirýär.
Redaktoryň ýaramaz maksatlar üçin ulanylmagynyň öňüni almak üçin, Google emeli aňdan peýdalanylandygyny görkezýän, görünmeýän suw nyşanlary (watermark) tehnologiýasyny döretdi. Şeýle-de kompaniýa bu neýrotoryň döreden suratlarynyň hemmesine suw nyşanlaryny ýerleşdirmegiň mümkinçiliklerini hem öwrenýär. Täze mümkinçilikler häzirki wagtda diňe käbir ulanyjylar üçin elýeterli, ýöne birnäçe hepdäniň dowamynda, Gemini elýeterli bolan ähli ýurtlara ýaýradylyp, 45-den gowrak dile terjime ediler.
