Nepal Ewereste çykýan alpinistleriň sanyny çäklendirer. Indi çykmak üçin ygtyýarnamany diňe ozal ýurduň 7 müň metr beýiklikdäki daglarynyň, iň bolmanda, birine çykan alpinistler alyp biler. Bu çözgüt dünýäniň iň beýik dagynda howpsuzlygy ýokarlandyrmak maksady bilen kabul edildi.
Nepalyň häkimiýetleri tejribesiz alpinistlere beýikligi 8,8 müň metrden geçýän depä çykmaga rugsat berendikleri üçin ençeme gezek tankyt bilen ýüzbe-ýüz boldy. Ýurt syýahatçylygy, şol sanda alpinizmi we trekkingi işjeň ösdürýär hem-de bu ugurdan ep-esli girdeji gazanýar.
Kislorod ýetmezçiligi bolan Ewerestiň depesindäki “Ölüm zolagy”, köplenç, uzyn nobatlaryň döreýän ýerine öwrülýär. Bu ýerde uzak wagtlap durmak bolsa jan üçin howpludyr. Her ýyl bu sebäpli Ewerestde birnäçe alpinist heläk bolýar.
Nepalda çykmak üçin ýaramly bolan 400-den gowrak dag bar, şolardan 74 sanysynyň beýikligi 7 müň metre ýetýär. Ýöne bu belentlikler Ewerest ýaly özüne çekiji däl. Täze kanun taslamasy eýýäm parlamentiň ýokarky palatasynda hasaba alyndy we bu ýerde dolandyryjy birleşigiň ony kabul etmek üçin ýeterlik sesi bar.
Halkara ekspedisiýalar Nepaldan daşary daglara çykanyňdan soň Ewereste çykmaga rugsat bermegi teklip edýär, ýöne kanun häzirlikçe diňe ýerli belentliklere degişlidir.
