Ýaponiýada ýaşaýan 27 ýaşly hytaýly talyp 4 günüň dowamynda Fudzi dagynyň gerşlerinden iki gezek halas edildi. Ýaş ýigit ýitiren smartfonyny gözläp, daga dolanyp barypdyr diýip, «BBC» habar berýär.
Ilkinji gezek 22-nji aprelde ony dagyň, takmynan, 3000 metr belentligindäki ýodadan dikuçar bilen alyp gaýtdylar. Ol aşak düşüp bilmändir, sebäbi buza ýapyşmak üçin ulanylýan, çeňňekli ýörite aýak enjamlary bolan koşkalaryny ýitiripdir.
26-njy aprel güni bolsa, alpinist ýene bir gezek howply ýagdaýa düşüpdir. Ol ýitiren zatlaryny, şol sanda smartfonyny hem tapmak üçin daga gaýdyp barypdyr. Emma ol dag keseline uçrap, gaýtadan halas edilmeli boldy. Häzirki wagtda ýaş ýigidiň saglyk ýagdaýy gowy, janyna howp abanmaýar.
Polisiýa Fudzi dagyna möwsümden daşary çykmagyň gadagandygyny ýatlatdy. Daga çykmak möwsümi diňe iýuldan sentýabra çenli dowam edýär. Ondan daşary döwürde ýodalarda lukmançylyk nokatlary işlemeýär we howa şertleri halas ediş çärelerini kynlaşdyrýar.
Beýikligi 3776 metr bolan Fudzi dagy Ýaponiýanyň iň gözel ýerleriniň biri hasaplanylýar. 2023-nji ýylda dag çykmak möwsüminde, bu daga 220 müňden gowrak adam çykypdyr. Häkimiýetler syýahatçylaryň köp gelmeginiň öňüni almak üçin, daga çykmak tölegini ýokarlandyrmak ýaly çäreleri girizýärler.
