Osaka uniwersitetiniň inženerleri ýyladyşhananyň içinde özbaşdak hereket edip, dikligine ekilen ýertudanalardan miwelerini ýygnap bilýän roboty hödürlediler. Prototip nawigasiýa üçin LiDAR sensorlardan peýdalanýar we geljekde işçi güýjüniň ýetmezçiliginiň öwezini dolmagy maksat edinýär diýip, «Interesting Engineering» neşiri habar berýär.
LiDAR sensorlar giňişligiň üç ölçegli kartasyny döretmek üçin ulanylýar, bu bolsa robota ýertudana ekilen ýataklaryň ýerleşişini anyk kesgitlemäge we çaknyşmalaryň öňüni almaga mümkinçilik berýär. Algoritm iki görnüşli iş tertibini goldaýar: öňünden kesgitlenen koordinatalara görä hereket etmek we ýertudanalary awtonom yzarlaýyş.
Bu tehnologiýa geljekde diňe bir hasyl ýygnamagy awtomatlaşdyrmak bilen çäklenmän, eýsem ösümlik kesellerine gözegçilik etmek, kesmek we beýleki işleri hem ýerine ýetirmäge kömek eder. Bu çemeleşme, esasan-da dik grýadkalar bilen işleşýän daýhanlaryň işini ep-esli ýeňilleşdirer.
Häzirki wagtda Ýaponiýa ilatynyň garrylygy we ýaşlaryň daýhançylyk bilen gyzyklanmazlygy sebäpli, oba hojalygynda işçi ýetmezçiligi bilen ýüzbe-ýüz bolýar. Şeýle awtonom ulgamlaryň ornaşdyrylmagy pudagy durnuklaşdyrmaga kömek eder.
