Auto Shanghai 2025 sergisinde Mercedes-Benz elektromobiller üçin täze tehnologiýalary hödürledi. Olaryň biri-de – “Gün boýagy” bolup, ol ulaglara goşmaça energiýa almaga we zarýad bermezden ýylda goşmaça müňlerçe kilometr geçmäge mümkinçilik berer. Bu barada Carscoops neşiri ýazýar.
Mercedes 20%-e çenli netijeli bolan Gün elementleri bilen işjeň fotoelektrik örtügini ulanmagy göz öňünde tutýar. Iň gowy şertlerde, mysal üçin, Pekinde şeýle ulgam ýylda goşmaça 14 000 km ýol goşup biler – bu günde, takmynan, 39 km. Häzirlikçe zarýad bermekden doly ýüz öwürmek mümkin bolmaz, ýöne tehnologiýa awtomobili ulanmakda amatlylygy ýokarlandyryp biler.
Şeýle-de, Mercedes her bir akkumulýator elementi bilen aýratynlykda işlejek mikro-sazlaýjysynyň üstünde işleýär. Ol zarýad derejesine garamazdan naprýaženiýany 800 wolta çenli durnuklaşdyrmaga kömek edýär. Bu hem geçilýän menzili artdyryp, ikitaraplaýyn zarýady gowulandyrar we batareýalaryň ýygnalmagyny ýönekeýleşdirer.
Ýene bir ugur – gönüden-göni transmissiýa we hereketlendiriji bloguna gurnalýan tormoz ulgamydyr. Kompaniýanyň maglumatlaryna görä, ol barlap ýa-da bejerip durmagy talap etmeýär, poslamaýar we tormoz berlende hapalaýjy bölejikleri çykarmaýar. Mundan başga-da, ulgam sessiz bolup, materiallaryň könelmegini azaldýar we awtomobiliň umumy energiýa netijeliligini ýokarlandyrýar.
Ýene bir taslamanyň çäklerinde awtoöndüriji Kanadadaky Waterloo uniwersitetiniň hünärmenleri bilen işleşýär. Olar beýniniň işleýşine ökünýän neýromorf hasaplamalaryna ünsi gönükdirýär. Şeýle tehnologiýalar emeli aňa çalt we az energiýa bilen işlemäge mümkinçilik berýär. Bu awtomobiliň işjeň howpsuzlyk ulgamlary üçin zerurdyr: olar ýol nyşanlaryny, bellikleri we beýleki obýektleri hatda dury däl howada-da takyk kesgitläp biler.
