26-njy aprelde Aba Annaýew adyndaky Halkara atçylyk akademiýasynda ahalteke bedewleriniň arasynda “Ýylyň iň owadan ahalteke bedewi” adyny almak ugrunda geçirilen halkara gözellik bäsleşiginiň ýeňijisi yglan edildi.
«2025-nji ýylyň iň owadan ahalteke bedewi» diýen ada 2020-nji ýylda doglan, Gerden we Tugly diýen bedewleriň nesli bolan, meşhur Gyrsakaryň ugruna degişli Meleguş diýen mele at mynasyp boldy. Halkara gözellik bäsleşiginiň ýeňijisi bolan atyň eýesine Prezident Serdar Berdimuhamedowyň baş baýragy — “Toyota Camry V6” kysymly ýeňil awtoulagyň açary, göçme kubok hem-de diplom gowşuryldy.
"Bedewler gözellik bäsleşigine taýýarlananda, synalary ýaraşykly, gylyk-häsiýeti gowy atlar saýlanyp alynýar. Bedewleri wagtly-wagtynda iýmitlendirmeli, ir säher tämiz howada, giç öýlan Günüň ýiti şöhlesi gowşanda olaryň gezimini ýetirmeli. Umuman, ot-iýmini ýetirmek bilen birlikde, olar Günüň nurdan, Aýyň şöhlesinden hem öz paýyny almaly. Synalarynyň has owadan, göze gelüwli bolmagy üçin atlar hemişe yhlas bilen idedilmeli. Ussat atşynaslardyr seýislerden, alymlardyr bilermenlerden, döredijilik işgärlerinden düzülen eminler toparynyň agzalary, ine, şu aýratynlyklara görä bedewleriň gözelligine adalatly baha berdiler" diýip, ýeňiji bolan bedewiň seýsi Batyr Annalyýew aýtdy we gymmat bahaly baýrak hem-de atçylyk pudagyny ösdürmäge berýän ägirt uly ünsi üçin Türkmenistanyň Prezidentine hoşallyk bildirdi.
