Google-yň Gemini atly emeli aňyny aýda, takmynan, 350 million adam ulanýar, bu bolsa ChatGPT we Meta AI bilen deňeşdirilende ep-esli azdyr. Bu sanlar golaýda Google bilen baglanyşykly geçirilen kazyýet diňlenişiginde ýüze çykaryldy diýip, «The Information» neşiri habar berýär.
«The Information» neşiriniň berýän maglumatlaryna görä, Google-a garşy alnyp barylýan bäsdeşlik düzgünlerini bozmak baradaky kazyýet işiniň dowamynda, kompaniýa kazyýetde Gemini atly emeli aň kömekçisiniň işjeň ulanyjylarynyň sanyny görkezýän slaýdy hödürläpdir. Bu maglumatlara görä, 2025-nji ýylyň mart aýynda Gemini-niň dünýä boýunça aýlyk işjeň ulanyjylarynyň sany 350 milliona deň. Şeýle-de Google-yň emeli aňyny gündelik 35 milliona golaý adam ulanýar.
Google bu sanlary ABŞ-nyň Adalat ministrliginiň «kompaniýanyň emeli aň arkaly gözleg ulgamyndaky agalygyny güýçlendirmeginiň öňi alynmaly» diýen talabyna jogap hökmünde hödürledi. Emma häzirki wagtda Google bu ugurda bäsdeşlerinden yza galýar. OpenAI we Meta bu babatda has öňde. «TechCrunch» neşiriniň habaryna görä, 2024-nji ýylyň sentýabrynda Meta AI-yň aýlyk ulanyjy sany 500 milliona golaý bolupdyr, OpenAI bolsa golaýda ChatGPT-niň her hepde dünýäde 400 milliondan gowrak adam tarapyndan ulanylýandygyny mälim etdi.
Ulanyjy sanyny hasaplamakda kompaniýalaryň usullary dürli-dürli bolsa-da, bu ýagdaý Google-yň emeli aň bäsdeşliginde OpenAI-den ep-esli yza galýandygyny görkezýär.
