Ýewropanyň we Amerikanyň Birleşen Ştatlarynyň barlagçylary beýniniň sesleri kabul edýän bölegine birikdirilýän çeýe elektrodlar we elektronika toplumyny döretdiler. Enjam makaka-rezuslarda üstünlikli synag edildi diýip, Lozannanyň Federal politehniki mekdebiniň (EPFL) metbugat gullugyna salgylanýan TASS habar berýär.
EPFL-niň professory Stefani Lakuryň sözlerine görä, "beýni ulgamynyň içine doly laýyk gelýän ýumşak implantatyň döredilmegi lukmançylyk sebäplere görä kohlear protezini goýup bolmaýan hassalaryň eşidişini dikeldiş ulgamyny ösdürmekde möhüm ädim boldy."
Makakalar bilen geçirilen synaglarda gazanylan üstünlikler bu tehnologiýany kliniki tejribä geçirmekde üstünlik gazanmagyň mümkindigini görkezýär, şeýle hem eşidişi has doly dikeltmegiň mümkindigini aňladýar.
Kohlear implantatlary takmynan 40 ýyl bäri ulanylýar. Olar sesi içki gulagyň eşidiş perdesine iberilýän elektrik signallaryna öwürýärler. Emma şeýle enjamlar hemmeler üçin amatly däl we hemişe nerw ulgamy bilen alşyp barmaýar.
Täze işläp taýýarlama düzüm bölekleriniň çeýe poliimid we platina plýonkalaryndan ýasalandygy bilen tapawutlanýar. Bu elektrodlara beýni dokumasynyň şekiline takyk girmäge mümkinçilik berýär. Adam saçynyň galyňlygyndaky on bir elektrodly prototipler makakalaryň beýni sütüniniň eşidiş merkezine ýerleşdirildi.
Synag wagtynda enjam sesi imitirleýän signallary döredýän kompýutere birikdirildi. Maýmynlar olara oňaýsyzlyk duýmazdan jogap berdiler.
Alymlar ýakyn wagtda meýletinçilerde synag geçirmekligi göz öňünde tutýarlar.
