15-nji aprelde Türkmenistanyň Horwatiýadaky ilçisi (oturýan ýeri Buharest ş.) A.Annaýew Horwatiýanyň daşary we ýewropa işleri ministri Gordon Grlik Radman bilen duşuşdy.
Türkmenistanyň DIM-niň metbugat gullugynyň habar bermegine görä, duşuşygyň barşynda hyzmatdaşlygyň ösüşine aýratyn üns berildi.
Şunuň bilen baglylykda, Ykdysady hyzmatdaşlyk boýunça türkmen-horwat hökümetara toparynyň işiniň depgininiň artmagynyň ähmiýeti barada nygtaldy. Taraplar gämi gurluşyk, derman, himiýa, azyk senagaty, gurluşyk, şol sanda deňiz portunyň gurluşygy, syýahatçylyk infrastrukturasy, gaýtadan işleýän senagat, ýokary tehnologiýalar, ylym, bilim ýaly ugurlarda hem-de beýleki pudaklarda gatnaşyklary giňeltmek babatda pikir alyşdylar.
Şol gün A.Annaýew Hökümetara türkmen-horwat dostluk toparynyň horwat tarapyndan başlygy deputat Goran Kaniski bilen duşuşdy.
Gepleşikleriň barşynda türkmen diplomaty hökümetara dialogy işjeňleşdirmegiň wajyplygyny nygtap, 2016-njy ýylda ýokarda agzalan dostluk toparynyň döredilmeginiň iki ýurduň kanun çykaryjy edaralarynyň arasyndaky ikitaraplaýyn hyzmatdaşlykda uly itergi bolup durýandygyny aýtdy.
Günüň ikinji ýarymynda ilçi A.Annaýew Horwatiýanyň Medeniýet we media ministrliginiň Halkara medeni hyzmatdaşlyk we ýewropa işleri müdirliginiň direktory Anýa Ýelawiç bilen duşuşdy.
Direktor horwat tarapynyň türkmen tarapy bilen medeniýet we medeni alyş-çalyş, ikitaraplaýyn çärelere gatnaşmak, şeýle-de türkmen muzeýleri bilen gatnaşyklary ýola goýmak babatda hyzmatdaşlyga isleg we gyzyklanma bildirýändigi barada belläp geçdi.
