Hermès International SCA gysga wagtlyk Fransiýanyň iň gymmat lýuks kompaniýasy boldy. Ol bazardaky umumy gymmaty boýunça LVMH konglomeratyndan öňe geçdi. Muňa garşydaşynyň paýnamalarynyň bahasynyň birden pese gaçmagy sebäp boldy diýip, «Bloomberg» neşiri habar berýär.
Sişenbe güni Hermès-iň bazardaky umumy gymmaty 243,65 milliard ýewro boldy. Bu görkeziji azajyk hem bolsa, LVMH-iň (Louis Vuitton Moët Hennessy SE) gymmatyndan ýokarydy. 2025-nji ýylyň birinji çärýegi boýunça hasabatyny çap edeninden soň, LVMH-iň bazardaky umumy gymmaty 8,35% peselip, 243,44 milliard ýewro çenli aşaklady.
Hermès Fransiýanyň CAC40 bazar indeksinde gysga wagtlyk birinji orna çykdy.
Şeýle hem belläp geçsek, 2010-njy ýylda LVMH konglomeraty Hermès-i satyn almakçy bolupdy, emma bu söwda başa barmandy.
Hermès-iň ýagdaýy lýuks harytlara bolan islegiň peselýän döwründe hem, garşydaşlaryna garanyňda has gowy. Bu bolsa kompaniýanyň ýöredýän «çäkli mukdar» strategiýasy, ýagny harytlaryň bilkastlaýyn az mukdarda çykarylmagy bilen düşündirilýär.
