Parižiň «Palais Galliera» muzeýinde Magaryfçylyk döwrüniň zenan keşbine we onuň häzirki zaman düşündirişine bagyşlanan «XVIII asyryň modasy. Hyýaly miras» atly sergi geçirilýär. Serginiň maksady, moda ösüşindäki uly öwrülişigiň hut şu taryhy döwre degişlidigini açyp görkezmekdir.
Guramaçylaryň pikiriçe, şol döwrüň stili hatda şu günki medeniýete hem öz täsirini ýetirýär. Sergide köpçülige 70-den gowrak lybas nusgalary, aksessuarlar, matalar we fotosuratlar hödürlenýär.
Serginiň iň arzyly gymmatlyklarynyň biri — Mariýa-Antuanettanyň hakyt özüne degişli korsetdir. Bu eksponatyň materialynyň ynjyk we zeper degmäge golaýdygy üçin, ony köpçülige gaty seýrek görkezýärler.
Gatnaşyjylar taryhy lybaslary «Chanel», «Christian Dior», «Louis Vuitton» we «Vivienne Westwood» ýaly meşhur moda öýleriniň döwrebap eşikleri bilen deňeşdirmäge-de mümkinçilik tapdylar.
Modanyň geçmişinden hem şu gününden gürrüň berýän bu sergi 12-nji iýula çenli dowam eder. Giriş petekleriniň bahasy 14 ýewrodan başlanýar.
