Seulda geçirilen ýokary tehnologiýaly moda görkezilişinde adamlar we ynsanpisint robotlar meňzeş lybaslarda tirkeşip podiuma çykdylar.
Galaxy Corporation göwün açyş kompaniýasynyň guramaçylary bu görkezilişiň adamlar bilen robotlaryň nähili ýagdaýda bile ýaşap biljekdigi baradaky soragy orta atmak maksady bilen guralandygyny mälim etdiler.
Tomaşaçylara robotlaryň gurluşyna laýyk edilip tikilen ýörite lybaslar hödürlenildi. Olaryň arasynda kowboý şlýapaly we seçekli tehas stilindäki gök toplum, retro stilindäki kümüşsöw gysga penjek, ýüpek köýnekler we 1970-nji ýyllaryň kosmos eýýamynda ýoň bolan giň gara balaklar bar.
Ynsanpisintler üçin niýetlenilen bu lybaslary kompaniýanyň özi işläp düzdi we olary ýylyň ahyryna çenli MACH 33 brendi astynda satuwa çykarmagy meýilleşdirýär. Modeller hökmünde Hytaýyň Unitree startapynyň robotlary ulanyldy. Unitree-niň baş direktory Çoý Ýon-ho bu görkeziliş baradaky pikirini beýan edip: «Biz robotlara-da eşigiň gerekdigine düşündik. Edil her bir ynsan ýaly, her bir robot hem özboluşly we gaýtalanmajak görnüşde bolmalydyr» diýip belledi.
Häzirki zaman çeýe robotlary eýýäm tans etmegi we aşyr atmagy başarýarlar. Morgan Stanley maliýe kompaniýasynyň çaklamalaryna görä, 2050-nji ýyla çenli dünýäde bir milliarddan gowrak ynsanpisint robot bolar. Şeýle-de bolsa, häzirki wagtda fiziki emeli aňa esaslanyp, doly awtonom işleýän robotlar örän seýrek duş gelýär we görkezilýän çäreleriň agramly bölegi öňünden programmirlenýär ýa-da uzakdan dolandyrylýar.
