Londonyň Patyşalyk kollejiniň alymlary ilkinji gezek barlaghana şertlerinde adam dişlerini üstünlikli ösdürdirdiler. Bu öňegidişlik barada The Telegraph neşiri habar berýär.
Regeneratiw stomatologiýa bölüminiň direktory Ana Angelowa Wolponiniň aýtmagyna görä, bu açyş “stomatologiýada rewolýusiýa geçirip biler”. Topar dişleriň ösýän tebigy gurşawyna meňzeş materialy döretdi. Ol öýjükleriň biri-biri bilen aragatnaşyk saklamagyna we dişleriň döräp başlamagyna mümkinçilik berýär.
Ylmy gözlegde akulalar we piller ýaly käbir haýwanlaryň dişlerini gaýtadan ösdürmäge ukyplydygy aýdylýar. Adamyň welin, ulalandan soň diňe bir hemişelik dişleri bar.
Täze tehnologiýa implantatlaryň we plombalaryň ornuny çalşyp biler. Hassanyň öz öýjüklerinden ösdürilen diş eňek bilen birleşmäge we tebigy ýaly dikelmäge ukyplydyr.
Ozal barlaghanada bu prosesi ýerine ýetirmek başartmandy: öýjükler biri-biri bilen bolmalysy ýaly gatnaşmady.
“Plomba – dişleriňi dikeltmek üçin iň gowy çözgüt däl. Wagtyň geçmegi bilen olar dişiň gurluşyny gowşadýar, hyzmat ediş möhleti çäkli we çüýrükligiň ýa-da duýgurlygyň hasam güýçlenmegine getirip biler.
Implantatlar inwaziw hirurgiýany we implantatlar bilen alweolýar süňkleriň gowy gabat gelmegini talap edýär. Çözgütleriň ikisi-de emeli bolup, dişiň tebigy funksiýasyny doly derejede dikeltmeýär, bu hem soňlugy bilen kynçylyklara sebäp bolup biler” – diýip, stomatologiýa, eňek-ýüz hirurgiýasy we kelleçanak-ýüz ylymlary fakultetiniň ylmy işgäri Sýueçen Çžan belledi.
