«Conceivable Life Sciences» kompaniýasynyň awtomatlaşdyrylan ulgamy dünýäde ilkinji gezek emeli aňyň kömegi bilen, ICSI usuly arkaly tohumlandyrmagy üstünlikli amala aşyrdy. Synagyň çäginde dörän bäbek eýýäm dünýä indi diýip, «New Scientist» neşiri habar berýär.
ICSI usuly (Intra Cytoplasmic Sperm Injection) – önelgesizligiň bejergisiniň usullarynyň biri bolup, köplenç spermatozoidleriň sanynyň az ýa-da hereketleriniň haýal bolan ýagdaýynda ulanylýar. Bu usulda spermatozoid ýumurtga öýjüginiň sitoplazmasyna gönümel sanjylýar. Ýokary takyklygy talap edýän usul, köplenç, şowsuz netije berýär.
«[Lukmanlar] hem beýleki hünärmenler ýaly käwagt ýadap, ünsüni sowup bilýär. Şonuň üçinem tohumlandyrmany we çaganyň dünýä inmeginiň ähtimallygyny peseldip biljek ýalňyşlyklar ýüze çykýar» — diýip, «Conceivable Life Sciences» kompaniýasynyň ýolbaşçysy aýtdy.
Emeli aň bu proseduranyň 23 tapgyrynda embriologyň işini ýerine ýetirdi. Ol iň sagdyn spermatozoidleri daşky alamatlaryna görä saýlaýar, olary lazer arkaly hereketsizleşdirýär we soň bolsa donor ýumurtga öýjügine sançýar.
Synaga çaga edinmekde kynçylyk çekip gelýän ýaş çatynja gatnaşdy. Sekiz donor ýumurtga öýjüginiň bäşisi emeli aň tarapyndan üstünlikli tohumlandyryldy. Olaryň dördüsi embriona öwrüldi. Iň gowy iki embrion implantasiýa üçin saýlanyldy. Olaryň biri göwreliligiň başynda düşdi, a beýlekisi bolsa, üstünlikli göwrelilik bilen, dünýä inmegi başardy.
Kompaniýanyň esaslandyryjysy Žak Koen bu usulyň netijeliligini doly bahalandyrmak üçin, goşmaça barlaglaryň zerurdygyny aýtdy. Tehnologiýanyň örän gymmatdygy sebäpli, onuň giňden ulanylmagy häzirlikçe mümkin däl.
