Hytaý hökümeti Amerikanyň Birleşen Ştatlaryndan importa goşmaça 50% gümrük pajynyň girizilýändigini yglan etdi. Bu barada “Sinhua” tarapyndan hödürlenen ýurduň Döwlet geňeşiniň nyrh komissiýasynyň beýanynda aýdylýar.
Şeýle göterim ozal ABŞ-nyň Prezidenti Donald Tramp tarapyndan Pekiniň öňki jogap hereketlerine jogap hökmünde girizen goşmaça töleglerine laýyk gelýär.
Bu ädim iki iň uly ykdysadyýetiň arasyndaky söwda garşylygynyň barha güýçlenmegi bilen, Hytaýyň amerikan harytlary üçin jogap paçlaryny ozalky 34%-den 84%-e çenli artdyrar.
Täze nyrhlar 2025-nji ýylyň 10-njy aprelinde güýje girýär.
“Hytaý ABŞ-ny öz nädogry amallaryny haýal etmezden düzetmäge, Hytaýa garşy birtaraplaýyn nyrh çäreleriniň ählisini ýatyrmaga we Hytaý bilen düşünişmezligi ikitaraplaýyn hormatyň esasynda deňhukukly dialogyň üsti bilen çözmäge çagyrýar” – diýlip, Döwlet geňeşiniň beýanynda aýdylýar.
Ýatlap geçsek, 2-nji aprelde Tramp 185 ýurtdan we sebitden getirilýän harytlara täze gümrük paçlarynyň girizilýändigini habar berdi. Hytaý bilen gatnaşykda nyrh 34% ýokarlandy. 4-nji aprelde Pekin 10-njy aprelden başlap ähli amerikan harytlaryna 34% gümrük pajynyň giriziljekdigini habar berdi. Şeýle-de, HHR birnäçe amerikan kompaniýasynyň işini we ABŞ-a birnäçe seýrek metallaryň eksportyny çäklendirdi.
8-nji aprelde Ak tamyň metbugat sekretary Kerolaýn Lewitt amerikan tarapynyň Hytaýdan harytlara 104% gümrük pajyny girizýändigini, sebäbi HHR-iň ABŞ-nyň 34% nyrhyna jogap çärelerini ýatyrmandygyny habar berdi. Trampyň aýtmagyna görä, goşmaça amerikan nyrhlary Hytaý şertnama baglaşýança dowam eder.
