1975-nji ýylyň aprel aýynda esaslandyrylan Microsoft korporasiýasy şu ýyl 50 ýyllygyny belleýär. Bu waka mynasybetli Bill Geýts ilkinji Basic interpretatorynyň çeşme koduny çap etdi. Bu programmany ol 1975-nji ýylda Pol Allen bilen bilelikde Intel 8080 prosessory esasynda işleýän Altair 8800 kompýuteri üçin ýazan eken.
Gates Notes web saýtynda interpretatoryň çeşme koduny öz içine alýan 175 sahypalyk doly PDF faýly goşmaça düşündiriş maglumatlary bilen ýerleşdirildi.
Programmanyň döredilen wagtlary olar öz kompaniýalaryny entek «Micro-Soft» diýip atlandyrýardylar we programmanyň işlejekdigine-de doly ynamlary ýokdy. Altair Basic üçin kody olar PDP-10 meýnfreým kompýuterinde ýazypdylar, sebäbi olaryň Altair kompýuteri ýokdy. Nýu-Meksiko barýan ýolda Pol Allen programmanyň soňky setirlerini ýazyp gutardy we ony MITS (Micro Instrumentation and Telemetry Systems) kompaniýasyna hödürledi.
«Şu kod böleginiň Microsoft-da ýarym asyrlyk innowasiýa ýol açandygy gör, nähili ajaýyp. Office, Windows 95, Xbox ýa-da AI peýda bolmanka, şu çeşme kod bardy. Men ony her gezek görenimde begenýän... hatda şu ýyllaryň dowamynda hem» — diýip, Geýts aýdýar.
Şeýle-de Geýtsiň YouTube kanalynda «Microsoft-yň gelip çykyşynyň taryhy» (The origin story of Microsoft) atly wideo hem çap edildi.
