Täze BMW M5 uniwersaly garaşylandan has meşhur boldy. Bu ýagdaý germaniýaly brendi öz teklip gurluşyna täzeden garamaga mejbur etdi. Bu barada BMW-niň M bölüminiň müşderiler bilen işleşmek, brend we satuwlar boýunça wise-prezidenti Silwiýa Noýbauer «BMW Blog» bilen geçirilen söhbetdeşliginde gürrüň berdi.
«Biz başda önümçiligiň üçden iki bölegini sedan, galan üçden birini bolsa uniwersal görnüşinde meýilleşdiripdik. Emma Touring-iň satuwy has ýokary boldy, şol sebäpdenem önümçilik indi deň paýlanýar» — diýip, ol aýtdy.
Onuň aýtmagyna görä, ABŞ üçin öndürilen BMW M5 ulaglarynyň, takmynan, ýarysyny uniwersal görnüşli modeller düzýär. Noýbauer hatda mahabat we marketing işleriniň takyk ýerine ýetirilmändigini, şonda-da müşderileriň bu modele has has ýokary isleg bildirendiklerini boýun aldy.
Şol bir wagtda 2024-nji ýylda iň köp satylan BMW M modeli M2 boldy. Ondan soň M3 we M4 modelleri gelýär. Noýbauer M2-niň önümçiliginiň tamamlanmazyndan öň, täze reňkleriň goşuljakdygyny hem mälim etdi.
BMW M-iň geljegi baradaky soraga, Noýbauer: «Geljek üçin anyk bir zatlar welin, maňa bu barada entek aç-açan gürlemek bolar öýdemok» — diýip, jogap berdi. Insaýderleriň maglumatlaryna görä, gürrüň täze elektrikli kupäniň prototipi hakda gidýär. BMW M8 modeliniň gönüden-göni ornuny tutjak täze model meýilleşdirilmeýär.
BMW M ulaglarynyň ýarysyndan gowragy mehaniki karobka bilen satylýar. Emma Noýbaueriň bellemegine görä, käbir segmentler beýle transmissiýa laýyk gelmeýär.
