2025-nji ýylyň 7-8-nji aprelinde Magtymguly adyndaky Türkmen döwlet uniwersiteti «Durnukly ösüşi üpjün etmeginiň esasy ugry: ekologiýa bilimi we daşky gurşawy goramagyň häzirki zaman meseleleri» atly sanly ulgam arkaly halkara ylmy-amaly maslahatyny geçirmegi meýilleşdirýär.
Maslahata Türkmenistanyň we daşary ýurtlaryň ýokary okuw mekdepleriniň professor-mugallymlary, ylmy işgärleri, degişli ministrlikleriň we edaralaryň wekilleri, şeýle hem ekologiýa kafedrasynda durmuşa geçirilýän Ýewropa Bileleşiginiň Erasmus+ Maksatnamasynyň «Merkezi Aziýada howa durnuklylygy we howpsuzlygy üçin suw pudagynda ýokary bilimi pugtalandyrmak» atly taslamasynyň hyzmatdaş ýokary okuw mekdepleri gatnaşar.
Maslahatyň barşynda howanyň üýtgemegi we adamyň täsiri sebäpli ýüze çykýan häzirki zaman ekologiýa meseleleri çuňňur seljeriler. Ekologiýa biliminde bar bolan çemeleşmeler maslahatlaşylar. Täze okuw meýilnamalaryny we dersleri, interaktiw gurallary we okuw üçin platformalary döretmek meselelerine garalar.
Maslahat öz işini umumy mejlisde we 3 bölümde alyp barar:
- I bölüm: Ekologiýa bilimini ösdürmekde innowasiýa tehnologiýalarynyň orny.
- II bölüm: Suw we ýer baýlyklaryny rejeli peýdalanmagy dolandyrmagyň usullary.
- III bölüm: Biologiýa dürlüligi öwrenmegiň we goramagyň esasy meseleleri.
Maslahatyň çykyşlarynyň gysgaça beýanlarynyň elektron ýygyndysyny taýýarlamak meýilleşdirilýär.
Ulgama baglanmak üçin salgy goşmaça iberiler.
Goşmaça maglumatlar Magtymguly adyndaky Türkmen döwlet uniwersitetiniň https://www.tdu.edu.tm resmi web saýtynyň “Ekologiýa-2025” bölüminde ýerleşdirilýär.
Maslahata gatnaşmaga isleg bildirýänler çykyşlarynyň gysgaça beýanlaryny (tezislerini), annotasiýalary we hasaba alyş kagyzyny 2025-nji ýylyň 31-nji martyna çenli tsuecoconference@gmail.com elektron salgysyna ibermeli.
Çykyşlaryň gysgaça beýanlarynyň (tezisleriň) möçberi 1,5 sahypadan geçmeli däl, annotasiýalaryň möçberi 0,5 sahypa çenli bolmaly, şrifti - Times New Roman, ölçegi - 14 pt, setir arasy - 1.
Habarlaşmak üçin:
Telefon: (+99312) 39-86-63; (+99365) 50-31-65.
Elektron salgysy: tsuecoconference@gmail.com
