19–20-nji martda ýurdumyzda Daşary ýurt dilleri boýunça Döwlet bäsleşiginiň III jemleýji tapgyry geçirildi. Bäsleşik Döwletmämmet Azady adyndaky Türkmen milli dünýä dilleri institutynda gysga möhletli kurslara gatnaýan ýaşlaryň arasynda guraldy.
Bu çäräni Türkmenistanyň Bilim ministrligi ýaşlaryň daşary ýurt dillerini öwrenmek derejesini kesgitlemek, zehinli ýaşlary höweslendirmek, döredijilik ukyplaryny açmak, özbaşdak işlemek başarnyklaryny ösdürmek we dil öwrenişiň hilini ýokarlandyrmak maksady bilen gurady.
Iňlis we rus dilleri boýunça geçirilen bäsleşik üç tapgyrdan ybarat boldy. Oňa dört ýaş topary gatnaşdy: 12–13, 14–15, 16–18 ýaş we 16 ýaşdan ulular.
Jemleýji tapgyrda ýurdumyzyň dürli bilim merkezlerinden jemi 203 okuwçy çykyş etdi. Olaryň 35-si Aşgabatdan we Ahal welaýatyndan, 31-si Balkan welaýatyndan, 47-si Daşoguz welaýatyndan, 42-si Lebap welaýatyndan we 48-si Mary welaýatyndan boldy.
Her ýaş toparynda ýeňijiler saýlandy: iňlis dili boýunça 28 we rus dili boýunça 28 okuwçy. Olar «Zehin ýoly», «Belent Bilim», «Bilim nokady», «Zehinli nesil», «Dana», «Altyn göreç», «Merdem ýaşlar» we beýleki okuw merkezleriniň wekilleridir.
Ýeňijilere diplomlar we sowgatlar gowşuryldy. Gurnamaçylar we eminler minnetdarlyk hatlary bilen sylaglanyldy.
Bäsleşik eýýäm yzygiderli üçünji ýyl geçirilýär.
