Ýewropa Komissiýasy Google we Apple kompaniýalaryny bäsdeşlige garşy kanunçylygy bozmakda aýyplaýar diýip, «Bloomberg» neşiri habar berýär.
Google "Sanly bazarlar hakyndaky" kanunyň (DMA) düzgünlerini bozmakda aýyplanýar. Kompaniýa gözleg ulgamynda öz hyzmatlaryny beýleki alternatiwalardan ileri tutmak we programmistleriň Google Play-den başga hyzmatlara geçmegini çäklendirmek bilen günäkärlenýär.
Apple hem şuňa meňzeş mesele bilen ýüzbe-ýüz. Ýewropa Komissiýasy kompaniýadan iPhone-yň operasion ulgamyndaky çäklendirmeleri gowşatmagy talap etdi. Emma Google-den tapawutlylykda, Apple häzirlikçe pul jerimesi bilen ýüzbe-ýüz bolmady. Kompaniýa geljekde bäsdeşlerine has açyk mümkinçilik döretmeli bolar.
Ýewropa Bileleşiginiň bäsdeşlik düzgünlerine gözegçilik edýän edarasynyň ýolbaşçysy Tereza Ribera bu meseleler bilen baglanyşykly çykyş etdi. Ol ÝB-niň esasy maksadynyň – kompaniýalaryň kanunçylyga laýyk hereket etmeklerini gazanmakdygyny aýtdy.
Google Ýewropa Komissiýasynyň çykaran kararynyň Ýewropadaky ulanyjylaryň tejribesini ýaramazlaşdyryp biljekdigini duýdurdy. Apple hem munuň bilen razylaşmaýandygyny mälim etdi. Kompaniýa ÝB-niň täze düzgünleriniň «ulanyjylaryň işini kynlaşdyrjakdygyny» öňe sürdi. Şeýle-de Apple kompaniýasy hem geljekde pul jerimesi bilen ýüzbe-ýüz bolup biler.
