Prezident Serdar Berdimuhamedow türkmen halkyny ýurdumyzda şatlyk-şowhun bilen bellenilýän Milli bahar baýramy — Halkara Nowruz güni mynasybetli gutlady.
"Ýaz paslynyň al-elwan güllerine beslenip gelen Nowruz baýramynda ýaňlanjak aýdym-sazlaryň, folklor çykyşlarynyň we milli gymmatlyklaryň sergileriniň Watanymyzyň döredijilik kuwwatyny artdyrmaga, raýatlaryň kalbynda milli mirasymyza, däp-dessurlarymyza söýgi döretmäge ýardam berjekdigine berk ynanýaryn" diýip, döwlet Baştutany gutlagynda belleýär.
Serdar Berdimuhamedow Türkmenistanyň hemişelik Bitaraplygynyň şanly 30 ýyllygynyň giňden bellenilýän Halkara parahatçylyk we ynanyşmak ýylynda Milli bahar baýramynyň — Halkara Nowruz gününiň taryhy ähmiýetiniň has-da ýokarlanýandygyny belleýär. Nowruz baýramynda berjaý edilýän däp-dessurlar parahatçylygy, ynanyşmagy, jebisligi, ynsanperwerligi giňden wagyz etmäge, ýaş nesilleriň kalbynda ýagşy gylyk-häsiýetleri terbiýelemäge, watansöýüjilige, dost-doganlyga, zähmetsöýerlige, halallyga söýgi döretmäge ýardam berýär.
Mälim bolşy ýaly, Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) Adamzadyň maddy däl medeni mirasynyň sanawyna girizilen Nowruz baýramynyň däp-dessurlary parahatçylygy, dostlugy dabaralandyrmakda örän ähmiýetlidir.
"Şöhratly ata-babalarymyzdan şu günlere gelip ýeten milli ýol-ýörelgelerimizde Nowruzyň aýratyn orny bardyr. Mälim bolşy ýaly, türkmen topragy gadymy döwürlerden bäri senetçiligiň, ussaçylygyň, ekerançylygyň, bagbançylygyň, daýhançylyk däpleriniň we el hünärleriniň ösen topragydyr. Ýaz paslynyň gelmegi bilen, babadaýhanlarymyz ýere tohum sepip, geljekki bol hasylyň düýbüni tutýarlar. Çopan-çoluklar uzak ýaýladaky sonarly sährada dowar sürülerini bakyp, bahar paslynyň ajaýyp günlerinde maldarçylyk bilen bagly işleri alyp barýarlar" diýip, Serdar Berdimuhamedow belleýär.
