2025-nji ýylyň 29-njy martynda Arkadag şäherinde «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahaty geçiriler. Prezident Serdar Berdimuhamedow degişli Karara gol çekdi.
Resminama laýyklykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna Daşary işler ministrligi, Arkadag şäheriniň häkimligi bilen bilelikde halkara maslahatyň ýokary derejede we guramaçylykly geçirilmegini üpjün etmek tabşyryldy.
Bellenilişi ýaly, bu resminama Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan ynsanperwer işlerini hem-de döwletimizde amala aşyrylýan ynsanperwer häsiýetli çäreleri Halkara parahatçylyk we ynanyşmak ýylynda has-da dabaralandyrmak, Türkmenistanyň bu şanly ýylyň dowamyndaky ynsanperwer ugurly hem-de eneligi we çagalygy goramak barada amala aşyrýan işlerini dünýä jemgyýetçiligine wagyz etmek, bu ugurdaky netijeli hyzmatdaşlygy ösdürmek we pugtalandyrmak barada alnyp barylýan işleri mundan beýläk-de dowam etdirmek maksady bilen geçiriler.
