Hytaýyň Starry Sky Glory kompaniýasy nobatdaky maliýeleşdiriş tapgyryny üstünlikli tamamlap, ýüz millionlarça ýuan toplady. Bu maliýe serişdeleri gaýtadan ulanylýan «Hyperbola-3» raketa göterijilerini öndürmek we synagdan geçirmek üçin sarp ediler. Bu barada «ITHome» portaly habar berýär.
Kompaniýa Mýanýan şäherinde Günorta-Günbatar Hytaýyň iň uly suwuk ýangyçly raketa hereketlendirijisi stendini (synag merkezini) gurýar. Onuň meýdany 5,3 gektar bolar we 200 tonna çenli itergi güýji bolan hereketlendirijiler bilen ýylda 100 gezek synag geçirmäge mümkinçilik döreder. Olaryň arasynda «Hyperbola-3» üçin niýetlenen «Focus-2» hereketlendirijisi hem bar.
Önümçilik hem barha artar. 2025-nji ýylyň aprel aýyna çenli ýylda 25 hereketlendiriji öndürjek önümçilik hatary işe giriziler, 2026-njy ýylyň ortalaryna çenli bolsa, bu san ýylda 100-e ýetiriler. Häzirki wagtda kompaniýa 14 tonna çenli ýük götermäge ukyply üç sany «Hyperbola-3» raketasyny ýygnamak bilen meşgullanýar.
Ilkinji synag uçuşy we deňiz platformasyna gonuş 2025-nji ýylyň dekabr aýynda bolar, ikinjisini bolsa 2026-njy ýylyň iýun aýynda geçirmek meýilleşdirilýär.
Starry Sky Glory gaýtadan ulanylýan raketalary döretmek ugrunda güýçli depginde öňe barýar we häzirki wagtda kosmos ýaryşynyň iň öňdebaryjy kompaniýasy hasaplanýan SpaceX bilen bäsleşmegi maksat edinýär.
