Prezident Serdar Berdimuhamedow senagat howpsuzlygy çygrynda bilermenleriň hünär synagyny geçirmegiň Tertibini tassyklady. Bu barada “Watan” habarlar gepleşiginde habar berildi.
14-nji martda geçirilen Hökümet mejlisiniň barşynda wise-premýer H.Geldimyradow “Senagat howpsuzlygy çygrynda bilermenleriň hünär synagyny geçirmegiň tertibiniň” taslamasynyň taýýarlanylyşy barada hasabat berdi.
Bellenilişi ýaly, bu resminama Türkmenistanyň hereket edýän kanunçylygyna laýyklykda, “Türkmenstandartlary” baş döwlet gullugy tarapyndan degişli ministrlikler, pudak edaralary hem-de welaýatlaryň, Aşgabat we Arkadag şäherleriniň häkimlikleri bilen bilelikde işlenip taýýarlanyldy. Kadalaşdyryjy namanyň taslamasynda bilermenleri hünär synagyndan geçirmegiň tertibi we möhletleri, talap edilýän resminamalaryň sanawy hem-de hünär synag toparynyň işiniň düzgünleri kesgitlenildi.
Döwlet Baştutany howply önümçilik desgalarynyň howpsuz ulanylmagyny üpjün etmek maksady bilen, bu ugurda taýýarlanan resminama gol çekdi we ony wise-premýere sanly ulgam arkaly iberip, degişli tabşyryklary berdi.
