Volkswagen kompaniýasy ID.4 we Audi Q4 e-tron elektrikli ulaglarynyň, takmynan, 13800 sanysyny bort zarýad enjamyndaky kemçilik sebäpli yzyna çagyrýar. Bu barada «INSIDEEVs» çeşmesi habar berýär.
Mesele platalaryň gorag örtüginiň ýeterlik däldigi bilen baglanyşykly. Bu kemçilik yzgaryň emele gelmegine, kuwwatyň ýitmegine we ulagyň hereketsiz galmagyna sebäp bolup biler.
Barlagçylaryň bellemegine görä, ID.4 ulaglarynda 127, Q4 e-tron ulaglarynda bolsa 117 gezek näsazlyk ýüze çykypdyr. Bu kemçilik ABŞ-da we Germaniýada öndürilen ulaglara täsir etdi.
Bu mesele Kanadadaky ulaglara hem täsir ýetirdi – ol ýerde 9613 sany ID.4 we 3278 sany Audi Q4 e-tron yzyna çagyrylmaga degişli edildi.
Volkswagen kompaniýasy ulaglaryň eýelerine 2025-nji ýylyň 29-njy apreline çenli duýduryş berer. Näsaz zarýad enjamlary mugt çalşylar, ýöne häzirlikçe dilerleriň ammarlarynda zerur bölekler ýok.
