ABŞ-nyň Kaliforniýa ştatynda Tesla Cybertruck-laryň biriniň eýesi Ilon Maskyň elektropikabyň suw geçirmeýändigi baradaky wadalaryny öz tejribesinde barlap gördi. 10-njy martda onuň ulagy Kaliforniýanyň Wentura portunda suwuň düýbüne çökdi diýip, «Los Angeles Times» neşiri ýazýar.
2023-nji ýylda, heniz Cybertruck köpçülikleýin önümçilige çykmanka, Tesla kompaniýasynyň baş müdiri Ilon Mask bu awtoulagyň «derýalary, kölleri, hatda asuda deňiz tolkunlaryny» hem geçip biljek derejede suw geçirmeýändigini öňe sürüpdi. Ol bu sözlerini birnäçe gezek gaýtalapdy. Emma Kaliforniýada bolan waka, bu tassyklamanyň hakyky däldigini görkezdi.
Sürüjiniň aýdyşyna görä, ol gidrosiklini suwa goýberenden soň, Cybertruck-y öňe sürmek isläpdir. Emma tötänden yzky peredaça geçiripdir. Netijede, awtoulag suwa gaçypdyr.
Toksiki batareýanyň ýangyn döretmeginiň öňüni almak üçin, ulagy suwdan seresaplyk bilen çykarmak maksady bilen, birnäçe gulluklar ýardama geldi.
