13-nji marta geçilýän gijede meýilleşdirilen SpaceX kompaniýasynyň Crew Dragon C210 Endurance gämisiniň uçuşy bolmady. NASA agentligi Crew-10 missiýasynyň Halkara kosmos stansiýasyna uçuşynyň ýaramaz howa şertleri – güýçli ýel we ygal sebäpli 14-nji marta süýşürilýändigini habar berdi.
Ekipažyň düzümine russiýaly kosmonawt Kirill Peskow, NASA-nyň astronawlary Enn Makkleýn we Nikol Aýers, şeýle-de JAXA-dan (Ýaponiýanyň Aerokosmos gözlegleri agentligi) Takuýa Onişi girýär. Floridadaky Kennedi kosmos merkeziniň 39A toplumyndan uçuş 14-nji martda gündogar wagty bilen 19:03-den (Aşgabat wagty bilen 15-nji mart 05:03) ir bolmaz.
Ilkibaşda uçuş 12-nji marta geçilýän gijede meýilleşdirilipdi, ýöne ýerüsti toplumyň gidrawlikasy bilen bagly näsazlyk sebäpli ýatyryldy. Soňra sene 13-nji marta üýtgedildi, ýöne bu gezek howa päsgel berdi. Eger ertirki uçuş üstünlikli bolsa, 19-njy martda ýere Crew-9 missiýasynyň ekipažy gaýdyp geler – kosmonawt Aleksandr Gorbunow we astronawt Nik Heýg. Olar bilen bilelikde kosmosda galan astronawlar Sunita Uilýams we Barri Uilmor hem HKS-den gaýdar. Olar stansiýada 8 günüň deregine tas 9,5 aý eglendi.
Ýatlap geçsek, Uilýams bilen Uilmor HKS-e 2024-nji ýylyň 5-nji iýunynda Boeing CST-100 Starliner gämisinde geldi, ýöne hereketlendiriji näsazlyklary we geliniň syzmagy sebäpli, gämi ekipažsyz dolandy.
