Türkmen tennisçileri ilkinji gezek ITF Masters dünýä çempionatynyň toparlaýyn ýaryşynda çykyş edýärler. Bu ýaryş 9–16-nji mart aralygynda Türkiýäniň Manawgat şäherinde geçiriler. Ýaryşa 30, 35, 40 we 45+ ýaş toparlarynda çykyş edýän 126 topar gatnaşýar.
Bu ýaryşa gatnaşmak üçin Türkmenistanyň ýygyndysyna çakylygy geçen ýyl ITF-niň prezidenti Dewid Haggerti ýurdumyza sapary wagtynda berdi. Milli ýygyndymyz 30+ ýaş toparynda çykyş eder, bu kategoriýada 12 ýygyndy dört topara bölünendir.
Türkmenistan “B” toparçasynda çykyş eder, onuň garşydaşlary Beýik Britaniýa we Kanada bolar.
“A” toparçasynda Germaniýa, Argentina we Portugaliýa, “C” toparçasynda ABŞ, Hindistan we Günorta Afrika, “D” toparçasynda bolsa Türkiýe, Irlandiýa we Şwesiýa bäsleşer. Toparçalaryň ýeňijileri pleý-off tapgyryna çykmaga mümkinçilik alar.
Türkmen ýygyndysynyň düzüminde aşakdaky türgenler çykyş ederler:
- Ýuriý Rogusskiý – ýurdumyzyň birinji raketkasy, bäş gezekki çempion we soňky iki Türkmenistanyň Kubogynyň ýeňijisi.
- Gurbanberdi Gurbanberdiýew – 2024-nji ýylyň Türkmenistanyň Kubogynyň bürünç medalçysy, Aşgabat şäheriniň Baş sport we bedenterbiýe müdirliginiň 11-nji sport mekdebiniň tälimçisi.
- Aleksandr Ernepesow – sport ussady, Türkmenistanyň öňki birinji raketkasy, 18 ýaşa çenli ITF Junior reýtinginde iň gowy 200 tennisçiniň arasyna giren türgen.
- Eziz Döwletow – Türkmenistanyň öňki birinji raketkasy, häzirki wagtda Türkmenistanyň Tennis federasiýasynyň başlygy we Aziýanyň Tennis federasiýasynyň (ATF) wise-prezidenti.
- Miraly Gasanow – toparyň kapitany, milli erkekler ýygyndysynyň we “Aşgabat” Tennis akademiýasynyň baş tälimçisi, Türkmenistanda PRO Level şahadatnamasyna eýe bolan ýeke-täk tälimçi.
Belläp geçsek, Döwletow we Ernepesow 2013-nji ýylda Türkmenistanyň ýygyndysynyň düzüminde Dubaýda (BAE) geçirilen Dewis Kubogynyň Aziýa we Okeaniýa zolaklarynyň IV toparynda ýeňiji bolupdylar.
Türkmen tennisçileri ITF Masters ýaryşynda ilkinji duşuşygyny Beýik Britaniýanyň ýygyndysyna garşy geçirerler.
