Beýik Britaniýanyň Patyşasy Karl III Apple Music üçin ýörite pleýlist (aýdym-sazlaryň sanawyny) taýýarlady. Onda monarhyň aýdym-saz isleglerini açyp görkezýän eserler ýerleşdiriler.
Sanaw diňleýjiler üçin 10-njy martdan başlap elýeter bolar. Onda Kaýli Minoug, Bob Marli, Greýs Jons we Raye ýaly meşhur aýdymçylaryň eserleriniň bolmagyna garaşylýar.
Britan Milletler Arkalaşygynyň baýramçylygynyň hormatyna Karl III «The King’s Music Room» (Patyşanyň aýdym-saz otagy) gepleşigine gatnaşmagy hem meýilleşdirýär. Ol gepleşikde öz durmuş ýolunda duşuşan sazandalary hakynda gürrüň berer hem-de näme üçin hut şu aýdymlary saýlandygy barada aýdyp berer.
«Durmuşymyň dowamynda, aýdym-saz meniň üçin örän uly ähmiýete eýe boldy. Munuň köpleriň durmuşyna-da şeýledigini bilýän. [Aýdym-saz] ýadymyzyň iň çuň künjeklerinden joşgunly ýatlamalary oýarmaga, gamgyn pursatlarymyzda bizi köşeşdirmäge we bizi uzak ülkelere äkitmäge ukyply» — diýip, Patyşa belledi.
