6-njy martda Aşgabatdaky Jemgyýetçilik guramalarynyň merkezinde Türkmenistanyň we Eýran Yslam Respublikasynyň öňdebaryjy, işjeň zenanlarynyň gatnaşmagynda «Zenanlaryň maşgalanyň binýadyny berkitmekdäki orny» atly duşuşyk geçirildi.
“Türkmenistan” gazetinde habar berlişi ýaly, duşuşygy Zenanlar birleşiginiň Merkezi geňeşi we Eýran Yslam Respublikasynyň Türkmenistandaky ilçihanasynyň Medeniýet merkezi bilelikde gurady.
Maşgala mukaddesligi, çaga terbiýesi, zenanlaryň döwletiň syýasy-jemgyýetçilik durmuşyndaky orny ikitaraplaýyn pikir alyşmalaryň esasy ugurlary boldy.
Duşuşygyň çäklerinde iki dostlukly halkyň eli çeper zenanlarynyň işleriniň, çeken suratlarynyň, milli gymmatlyklaryň sergisi guraldy. Duşuşyga gatnaşyjylar olar bilen içgin gyzyklanyp, özara sowal-jogap alyşdylar. Goňşy ýurduň Türkmenistandaky ilçihanasynyň Medeniýet merkeziniň hünärmenleri eýranly zenanlaryň misden, pöwrize daşyndan ýasalan gap-gaçlaryň ýüzüne çeken nagyşlary, nakgaşlyk eserleri barada gürrüň berdiler.
Soňra duşuşyk «Parahatçylyk we ynanyşmak — binýatlyk ýörelge», «Çaga terbiýesi — röwşen geljegiň binýady», «Telekeçi zenanlar ykdysadyýetiň ösüşinde» atly temalar boýunça özara pikir alyşmalardyr maslahatlar bilen dowam etdi.
