Distinctive Assets kompaniýasy “Oskar” baýragyna dalaşgärleriň her biri üçin 216 müň dollarlyk sowgat taýýarlady. Sowgatlyk toplumlarynyň umumy bahasy 5,4 mln dollardan geçdi, bu geçen ýylky bilen deňeşdirilende ($180 müň) ep-esli köpdür diýip, El País habar berýär.
Kompaniýa dalaşgärlere gymmatly sowgatlary eýýäm 23 ýyl bäri berýär.
Şu ýyl sowgatlary 25 dalaşgär alar: iň gowy erkek we zenan keşpleri üçin aktýorlara 10 we ikinji plandaky keşpler üçin 10 sowgat. Şeýle-de, iň gowy režissýorlar üçin bäş sowgatlyk toplumy bar. Baýragyň ýeňijileri ýokary derejeli brendlerden lýuks kosmetika, atyr, çakyr we sowuk nahar, şeýle-de saçak üçin tagtalary, elde ýasalan şemdanlary, ýassyk, itler üçin eşik, köwüş üçin deri torbalaryny alar. Ýöne esasy baýrak Barselonanyň, Maldiwleriň we Şri-Lankanyň myhmanhanalaryna gezelençdir.
Heýkeli alyp bilmedik dalaşgärler hem ünssüz galmaz. Olar üçin hem ýörite baýrak berler. Ýöne bu barada anyk maglumat berilmeýär.
Şeýle-de, baýragyň guramaçylary mukdaryň bir bölegini Los-Anjelesdäki ýangynlar sebäpli zeper ýeten jaýlary abatlaýyş we gurmak hyzmatlary hem-de ätiýaçlandyryş üçin sarp etdi.
Mysal üçin, Bright Harbor kompaniýasy her bir dalaşgär üçin 39 müň dollardan gowrak pul berýär. Bu mukdara heläkçiligi başdan geçirenler üçin abatlaýyş işinde kömek etmekden başlap, ipotekany dolandyryşa we psihologiki goldawy bermäge çenli meýilnamalary işläp düzmek girýär. Kompaniýa 25 dalaşgäriň her birine beýleki ejir çekenlere kömek edip biler ýaly hersi 3,5 müň dollarlyk 10 wauçer hem berýär.
Sowgatlyk toplumlary “Oskar” baýragynyň özi bilen baglanyşykly däl we dabaradan soň berilýär.
“Oskar” baýragynyň 97-nji gowşurylyş dabarasy Los-Anjelesde geçirildi. Ýylyň iň gowy filmi režissýor Şon Beýkeriň “Anora” dramasy boldy. Film bäş nominasiýada ýeňiş gazandy.
