Fransiýanyň Juraflore peýnir kompaniýasy dünýäde iň uly peýnirli fondýuny taýýarlady. Taýýar tagamyň agramy 2117 kilogramdan gowrak boldy we ol Ginnesiň rekordlar kitabynda resmi taýdan hasaba alyndy diýip, UPI agentligi ýazýar.
Fondýu – bu açyk otda peýnirden we çakyrdan taýýarlanýan tagam. Ony taýýarlamak üçin Juraflore uly mis gazany ulandy. Oňa birnäçe aý saklanan 40 baş Konte peýniri we 1,5 kg ak burç, tas 2 kg sarymsak we 54 kg mekgejöwen krahmaly goşuldy. Esas hökmünde Şardone we Sawanýen görnüşli ak çakyr ulanyldy.
Fondýu açyk otda taýýarlandy, bu tagamy taýýarlamagyň däp bolan usulydyr. Guramaçylaryň habar bermegine görä, gastronomiki wakanyň şaýady bolmak we bu özboluşly tagamdan dadyp görmek üçin 5000 töweregi adam geldi.
